വാക്കുകളുടെ നദിയില്‍

വാക്കുകളുടെ നദിയില്‍
ചൂണ്ടിയിട്ടിരിപ്പാണവന്‍

തടവ്, ഭൂതം, ഓര്‍മകള്‍
രതി, ഏകാന്തത, മറവി

വാക്കുകള്‍ നദിയില്‍
തുള്ളിക്കളിക്കുന്നു
ശ്വസിക്കുന്നു
വീണ്ടും ആഴപ്പരപ്പില്‍ വന്നെത്തി
നോക്കുന്നു
കുട്ടികള്‍ മണല്‍കൊണ്ട്
വീടുകെട്ടുന്നതു നോക്കി
പൊട്ടിപ്പൊട്ടിച്ചിരിക്കുന്നു

ഓരോ വാക്കും
കൂട്ടുചേരുന്നു
പരസ്പരം കെട്ടിപ്പിടിക്കുന്നു
കൂട്ടുപിരിയുന്നു

നദിക്കരയിലിരിപ്പവന്‍
വാക്കുകള്‍ കൊത്താത്തചൂണ്ട
മുറിഞ്ഞ പ്രണയം പോല്‍
വലിച്ചെറിയുന്നു

ചീതം പിടിച്ചൊരു വാക്കായ്
രാത്രി കരിമ്പടപ്പുതപ്പുമായെത്തുന്നു
ഇരുളില്‍ തിരിഞ്ഞു നടക്കുമ്പോള്‍
വാക്കുകളെറിഞ്ഞ ചൂണ്ടയില്‍
ജീവിതം പോല്‍
കൊളുത്തി നില്‍ക്കുന്നുണ്ടവന്‍